De sa grande amie

Clément Marot, L'Adolescence clémentine, Rondeau XXXIX.

Dedans Paris Ville jolye
Ung jour passant melancolie
Je prins alliance nouvelle
A la plus gaye Damoyselle,
Qui soit d'icy en Italie.
D'honnesteté elle est saisie,
Et croy (selon ma fantaisie)
Qu'il n'en est gueres de plus belle
Dedans Paris.
Je ne la vous nommeray mye,
Si non que c'est ma grand Amye ;
Car l'alliance se feit telle,
Par ung doulx baiser, que j'eus d'elle
Sans penser aulcune infamie,
Dedans Paris.